Hotel Tvøroyri tekur yvir raksturin av kantinuni í Ítróttarhøllini í Trongisvági

Hotel Tvøroyri tekur yvir raksturin av kantinuni í Ítróttarhøllini í Trongisvági

1. apríl 2025

Frá 1. apríl 2025 verður tað Hotel Tvøroyri, sum kemur at reka kantinuna í Ítróttarhøllini í Trongisvági.

Tvøroyrar býráð hevur samtykt at taka av tilboðnum frá Hotel Tvøroyri, sum hevur víst áhuga fyri at reka kantinuna. Hetta merkir, at gestir og luttakarar á ymiskum tiltøkum í høllini framyvir kunnu gleða seg til eina betraða tænastu og góðan mat úr hondum hjá royndum staðbundnum aktørum.

Kantinan er partur av ítróttar- og skúladeplinum í Trongisvági, og ætlanin er, at hon skal hava opið í sambandi við tiltøk, ið fara fram í høllini. Ítróttarhøllin er ein livandi karmur um fjølbroytt virksemi, so sum ítróttartiltøk, venjingar, kappingar og framførslur.

Harumframt verður høllin eisini brúkt til tónleikatiltøk, konsertir, framsýningar, sølustevnur og onnur mentanarlig tiltøk. Forhøllin og skúlahøllin kunnu eisini verða tikin við í raksturin, og verður kantinan sostatt partur av einum fjølbroyttum og spennandi virksemi.

Talan kann verða um tænastur til tiltøk so sum veitslur, fundir, merkisdagar, framløgur, móttøkur og mangt annað. Við Hotel Tvøroyri við róðrið, er vónin at skapa eina livandi og innbjóðandi kantinu, sum stuðlar undir bæði ítrótt og mentan í økinum.

Mynd av Kristin Michelsen, borgarstjóra, Diana Nolsøe, starvsfólk á Hotel Tvøroyri og Edmund Kjærbech, stjóri og eigari av Hotel Tvøroyri, eftir at rakstraravtalan var samtykt í dag 1. apríl.