Nú sunnudagin 30. november kl. 16:00, verður jólatræið á Tvøroyri, ið er tiltikið fyri at vera serliga vakurt prýtt, tendrað.

Jólamenninir koma koyrandi í hestavogni inn til økið frammanfyri jólatræið og fara at heilsa upp á børnini og bjóða karamellur.

Bollar og kakao verður at fáa til øll, ið hava hug til at verða við til hesa hugnaligu løtu.

Tvøroyrar hornorkestur spælir, Barbara Tausen, forkvinna í mentanarnevnd Tvøroyrar Býráðs, bjóðar vælkomin, Annika Magnussen Gaard, prestur á Tvøroyri, sigur nøkur orð og síðan verður træið tendrað.

Eftir tað spælir Tvøroyrar hornorkestur aftur. Løgini, ið spæld og sungin verða, eru at finna í talgildum sanghefti her https://www.calameo.com/read/0058996693cdba8c474da so til ber at nýta telefonina at síggja sangheftið, í myrkrinum. Øll børn fáa ein posa við góðgæti á p-økinum við Bónus, har uppmerkt verður, júst hvar hvør aldursbólkur skal stilla seg í bíðirøð.

ANNAÐ

Árligi, stóri Jólamarknaðurin á Seglloftinum letur longu upp kl. 14:00 og letur aftur kl. 19:00. Fólk náa sostatt at vitja bæði áðrenn og/ella aftan á jólatræshaldið. Jólamenninir vitja eisini jólamarknaðin beint eftir jólatræið.

Spennandi tiltakið "Jól hjá Thomsen" byrjar eisini sunnudagin kl. 16:00.

JÓLASKRÁIN

Hyggið endiliga at spennandi, stóru og fjølbroyttu jólaskránni, ið er at finna her https://www.calameo.com/read/0058996692b3ec5ddc412 

Hjartaliga vælkomin.