Tvøroyrar kommuna fer í næstum undir eitt átak at rudda á kommunalum økjum – serliga í grótbrotinum undir Akurgerði. Hetta umfatar millum annað órudd, bilvrak, ónýtilig akfør, bingjur og annað tilfar, sum stendur uttan avtalu á økjum hjá kommununi.

Fyrsta stigið í hesum átakinum er at fáa ruddað alt tilfar, sum ikki er ogn hjá Tvøroyrar kommunu, á økinum eystanfyri kommunala ruskplássið – tað er økið, sum sæst á viðfestu myndini.

Borgarar og fyritøkur, sum hava sett lutir, tilfar ella annað á økið, verða hervið biðin um antin at koma eftir sínum ognum, ella at seta seg í samband við teknisku deild á tvoroyri@tvoroyri.fo í mun til at gera avtalu um, at fáa tilfarið burtur av umrødda økinum.

Kommunan fer eisini í næstum at seta seg beinleiðis í samband við teir eigarar, sum kommunan veit, hava tilfar liggjandi á økinum.

Freist og avleiðingar

Um tilfar liggur eftir á nevndu økjum, og eingin hevur gjørt vart við sín ognarskap ella gjørt avtalu við kommununa áðrenn 1. mars 2026, fer Tvøroyrar kommuna at burturbeina tað fyri eigarans rokning.

Spurningar kunnu sendast til: tvoroyri@tvoroyri.fo

Lógarásetingar

Átakið verður framt við tilvísing til:

• § 10 í kunngerð um burturkast, sum m.a. ásetur, at ”…ónýtilig akfør […] [ikki skulu] latast liggja og rekast í haga, fjøru, á sjógvi, fram við vegi ella aðrastaðni”.

• § 11 í kunngerð um burturkast, sum ásetur, at ”burturkast skal avhendast regluliga fyri at fyribyrgja uppsavnan á staðnum. Kommunustýrið skal um neyðugt geva boð um, hvussu reglulig avhendingin skal vera.”

• § 61 í ferðslulógini, sum gevur heimild til, at løgreglan kann taka burtur ella selja skrásetingarskyldug akfør, sum standa uttan nummarplátu á almennum vegi.

Tekniska deild

Tvøroyrar kommuna