Við Kulagjógv í fjøruni uttan fyri Froðba sæst eitt sera vakurt og áhugavert fyribrigdi av basaltstabbum, sum venda í ymsar ættir. Stabbaviftan í sjálvi gjónni skarar framúr, og kann minna um dansandi kvinnur.

Basaltstabbar stava frá niðurkølingini av basaltinum eftir at tað upprunaliga storknaði, longu tá tað var kølt niður á umleið 1000 ⁰ C. Týðiligir stabbar gerast serliga, um basaltið verður kølt lutfalsliga skjótt niður, til dømis um lendið er vátt undir eini nýkomnari basaltflógv. Stabbarnir venda hornrætt á kølingina, so um kølingin kemur frá einum sløttum undirlag, gerast stabbarnir regluliga loddrættir, men um undirlagið er óslætt ella kølingin kemur frá ymiskum síðum, gerst stabbaskapið hareftir.