Tvøroyrar Skúli sett trygdarskipan í verk
Hin 1. mai kunngjørdi Tvøroyrar Skúli á heimasíðu síni, at skúlin hevði sett eina trygdarskipan í verk.Sambært skúlastjóranum í Tvøroyrar Skúla, Finn Thomsen, er hetta eitt lógarkrav frá landsins myndugleikum og hevur skúlin arbeitt við at fáa hetta sett í verk og er nú komið á mál.
Skipanin, ið er ein verja av starvsfólkunum hjá skúlanum, hevur greiðar mannagongdir fyri allar hugsandi støður, ið kunnu uppstanda á arbeiðsplássinum. Nøvn eru sett á øll økir og ábyrgdarfólk eru samsvarandi sett til hvørt øki. Á henda hátt vita starvsfólkini altíð hvønn tey kunnu venda sær til, skuldi okkurt hent.
Martin Øster, húsavørður, er settur sum trygdarleiðari hjá Tvøroyrar- og Trongisvágs Skúla. Sjálv trygdarskipanin er tilevnað á einum 3 daga trygdarskeiði á Miðnámsskúlanum í Hovi, har skúlaleiðslurnar og trygdarumboðini luttóku.
Finn sigur, at skúlin hevur havt ymiskar venjingar og hava hesar givið ábendingar um at nøkur ting skulu broytast, meðan tað sær gott út á øðrum økjum. Trygdarskipanin varð, sum áður nevnt, sett í verk 1. mai 2017 og fylgir skipanin reglugerðini hjá Mentamálaráðnum.
Umsitingin, Tvørávegur 37, Postboks 80, 800 Tvøroyri - Tlf. 611085 - tvoroyri@tvoroyri.fo