Fyri Tvøroyri hevur Varðin Pelagic alstóran týdning sum arbeiðspláss, vinnuligt lokomotiv og drívmegi í menningini av býnum.

Tvøroyrar kommunu ynskir nýggju nevndini og leiðslunum blíðan byrð við tí stóra áliti, sum teimum er givið, og við teimum týdningarmiklu uppgávum og ætlanum, sum liggja fyri framman at menna fyritøkuna og lokalsamfelagið enn meira.

Tvøroyrar kommuna sær fram til eitt framhaldandi tætt, gott og álitisfult samstarv við bæði P/F Varðan og P/F Varðan Pelagic – við Tvøroyri sum einum týðandi parti av framtíðar menningini.

Fólkatalið er ein týðandi ábending um gongdina, men talið kann ikki standa einsamalt. Skulu vit fáa eina rættvísa mynd av støðuni, mugu vit eisini hyggja at flytingarmynstrinum, aldursbýtinum, arbeiðsvirkseminum og inntøkugrundarlagnum.

Nú málið um heilsumiðstøð í Suðuroynni hevur fingið størri almennan og fjølmiðlaligan áhuga, ynskir Tvøroyrar kommuna at lýsa orsøkina, endamálið og gongdina í málinum.

Tað er týdningarmikið, at málið verður sæð í sínum rætta samanhangi. Ætlanin um eina nýggja heilsumiðstøð er ikki sprottin úr einum ynski um eina ávísa staðseting, men úr einum fakligum tørvi á at framtíðartryggja kommunulæknatænastuna í Suðuroynni.

Málið um eina framtíðar heilsumiðstøð í Suðuroynni hevur sín uppruna í drúgvu avbjóðingunum við at manna kommunulæknastørvini við føstum læknum og tryggja borgarunum eina støðuga og samanhangandi læknatænastu. Ætlanin tekur m.a. støði í fundinum 30. desember 2024, har verandi og komandi kommunulæknar mæltu til eina nýggja, felags læknamiðstøð fyri alla Suðuroynna og vístu á, at tað ikki var nøktandi bert at betra um og útbyggja verandi læknamiðstøðir í Vági ella á Tvøroyri.

Við hesum sum grundarlagi mentu Tvøroyrar, Hvalbiar og Fámjins kommunur saman við BRIM Arkitektum eitt ítøkiligt uppskot til bygging av einari nýggjari heilsumiðstøð á Tvøroyri. Allar kommunurnar í Suðuroynni vórðu bodnar við í ætlanina. Hov, Porkeri, Vágur og Sumba svaraðu, at tær heldur ynsktu at halda fast við eina loysn, har verandi heilsumiðstøð í Vági verður útbygd.

Sostatt liggja nú tvær ymiskar loysnir á borðinum hjá landstýriskvinnuni, meðan yvirskipaða endamálið er: at framtíðartryggja kommunulæknatænastuna og heilsutænasturnar í Suðuroynni í samsvari við tørvslýsingina og ynskini hjá kommunulæknunum.

Heilsu- og orkumálaráðið hevur boðað frá, at landsstýriskvinnan metir tað vera skilabest, at ein tíðarhóskandi heilsumiðstøð verður í Suðuroynni til gagns fyri allar borgarar í oynni, og at avgerðin um staðsetingina verður tikin við heimild í § 3, stk. 2 í løgtingslóg nr. 66 frá 28. apríl 2025.

Ein longri greining niðanfyri lýsir tilgongdina, fakliga grundarlagið, lógarheimildirnar, kommunalu samtyktirnar og tær fyriliggjandi loysnirnar.

Samanberingin vísir, at Tvøroyrar kommuna hevur eina lutfalsliga góða skuldarstøðu.

Nettoskuldin var við árslok 2025 umleið 22.800 kr. fyri hvønn íbúgva. Tvøroyri hevur sostatt fjórðlægstu nettoskuldina fyri hvønn íbúgva í hesum kommunubólkinum.

Nettoskuldin hjá Tvøroyrar kommunu svaraði við árslok 2025 til 33 prosent av inntøkugrundarlagnum, sum verður nýtt til at áseta skuldarloftið. Eisini her hevur Tvøroyri fjórðlægsta skuldarlutfallið millum kommunurnar við fleiri enn 1.000 íbúgvum.

Munandi íløgur samstundis sum skuldin er lág

Skuldarstøðan hjá Tvøroyri er serliga áhugaverd, tá hon verður sædd saman við íløguvirkseminum.

Tvøroyrar kommuna framdi nettoíløgur fyri 20,2 mió. kr. í 2025. Við 1.697 íbúgvum svarar hetta til umleið 11.900 kr. í íløgum fyri hvønn íbúgva.